सिलगढी, १४ अप्रेल २०२०
आइडीआरएफ (इन्डियन डेमोक्रेटिक रिब्युलोसनरी फ्रन्ट) का अध्यक्ष डा. क्रिस्टोफर गहतराज अब रहेनन् । उनले मङ्गलबार बिहान ५:३० बजे दिल्लीको सुभाष नगरको ब्लक १७ मा अवस्थित आफ्नै बासस्थानमा नश्वर शरीर त्यागे । एक जनवरी १९५५ मा डुवर्सको लङ्कापाड़ा चियाबारीमा बुवा बेञ्जामीन र आमा जेठी गहतराजको पहिलो सन्तानको रुपमा उनले जन्म लिएका थिए । प्रारम्भिक शिक्षा स्थानीय विद्यालयबाट लिएका क्रिस्टोफर गहतराजले दून बाइबल कलेजबाट विद्यावारिधि गरेका थिए । स्व. सुवास घिसिङको गोर्खाल्याण्ड आन्दोलनमा चर्चामा आएका उनी दागोपाप सम्झौतापछि परिवारै दिल्लीमा सरेका थिए । त्यहाँ उनले सामाजिक कार्यमा सम्लग्न हुँदै २०१३ मा राजनैतिक पार्टी आइडीआरएफ (इन्डियन डेमोक्रेटिक रिब्युलोसनरी फ्रन्ट) को गठन गरे । उनको यो पार्टीको केन्द्रिय दिल्लीमा अनि वर्तमान समयमा छवटा राज्यहरूमा सञ्चालित छ । यस क्रममा १७ औं लोकसभाको चुनाउमा उनी आफै ओर्लिएका थिए । हिजो बेलुका उनलाई मुटुको समस्या परेको थियो । तर अस्पताल जान मानेन् । बिहान हृदयघातको ब्यथाले च्यापेपछि उनले प्राण त्यागे । स्व. गहतराजले आफूपछि श्रीमती, तीन छोरा, एक बुहारी दुइ छोरी लगायत नातानातिना छोड़ी गएका छन् ।
डा. गहतराजको निधनमा आइडीआरएफको दार्जीलिङ जिल्लाका पूर्व अध्यक्ष सञ्जय ठकुरीले संवेदना प्रकट गर्दै उहाँ जस्ता जातिप्रेमी र निजर नेताबाट धेरै कुरा सिक्न पाएको अनि उनको निधनले हाम्रो जाति र समाजको लागि ठूलो क्षति भएको बताउँदै अनको आत्माले चिर शान्ति पाउन् भनी कामना गरेका छन् ।