काठमाण्डौँ, 13 मई 2020
चितवनकी 63 वर्षीया महिला कोरोना उपचारपछि आज डिस्चार्ज भएकी छन्। कोरोना भाइरसको संक्रमणपछि भरतपुर अस्पतालमा उपचाररत उनको पछिल्लो 2 वटा रिपोर्ट नेगेटिभ आएपछि डिस्चार्ज गरिएको अस्पतालका अध्यक्ष डा. भोजराज अधिकारीले जानकारी दिनुभयो। अस्पतालमा राप्ती नगरपालिका–8 की ती महिलाका 27 वर्षीय छोरासमेत कोरोना संक्रमणपछि उपचाररत थिए। छोरा केही समय अघि मात्र निको भएर फर्किसकेका छन्।
दुवैका अवस्था सामान्य रहेको र अझै 2 साता घरमै क्वारेन्टिनमा बस्नुपर्ने बताइको छ। उनीहरु दुवै आमा छोरालाई राप्ती नगरपालिकालाई जिम्मा लगाइएको छ। दुवै आमा छोरा गत चैत 3 गते बेलायतबाट नेपाल आएका थिए, चैत 5 गते चितवन आइपुगेका थिए। वैशाख 4 गते भरतपुर कोभिड–19 परीक्षण प्रयोगशालामा उनिहरूमा कोरोना पोजिटिभ देखिएको थियो।
योसँगै नेपालमा कोरोना विरुद्धको लडाई जित्नेको संख्या 35 पुगेको छ। हालसम्म नेपालमा 217 जनामा कोरोना भाइरसको संक्रमण देखिएको छ।
