काठमाडौं, 31 दिसम्बर 2021
नेकपा माओवादी केन्द्रका अध्यक्ष पुष्पकमल दाहाल प्रचण्डले पार्टीको जारी आठौं महाधिवेशनमा प्रस्तुत गरेको राजनीतिक प्रतिवदेन सर्वसम्मतिले पारित भएको छ । शुक्रबार बन्दसत्र हलबाट प्रचण्डको प्रतिवेदन पारित भएको हो । त्यसअघि प्रचण्डले प्रतिवेदनमा उठेका प्रश्नहरूमाथि जवाफ दिनुभएको थियो । प्रतिवेदनमा आएका सुझावहरूलाई समेट्दै प्रतिवेदनमा व्यापक सुधार गर्ने प्रतिवद्धता प्रचण्डले जनाउनुभएको थियो । उहाँले दस्तावेजले पार्टीको क्रान्तिकारी विचार निर्माण प्रक्रिया सुरु गरेको, पार्टीलाई क्रान्तिकारी दिशामा लगेको र विचार संश्लेषणका लागि महान बहसको थालनी गरेको निष्कर्ष सुनाउनुभएको थियो । त्यस्तै उहाले तीनै तहका आगामी निर्वाचनपछि पार्टीको विशेष महाधिवेशन आयोजना गरेर विचारको संश्लेषण गर्ने प्रस्ताव महाधिवेशन समक्ष राख्नुभएको थियो । प्रचण्डले सुझाव र जिज्ञासामाथि जवाफ दिने क्रममा स्थायी कमिटी सदस्य राम कार्कीले राख्नुभएको पुरक प्रस्तावलाई स्वीकार गरेर दस्तावेजमा समावेश गर्ने र केन्द्रीय सदस्य लेखनाथ न्यौपानेले राख्नुभएको भिन्न मतलाई भिन्न मतकै रुपमा स्वीकारेको जानकारी गराउनुभयो । बन्दसत्रमा पार्टीको केन्द्रीय निर्वाचन आयोगका प्रमुख विष्णुपुकार श्रेष्ठ, केन्द्रीय अनुशासन आयोगका प्रमुख टंक राई र केन्द्रीय लेखा आयोगका प्रमुख पेशल खतिवडाले आयोगका प्रतिवेदनहरु प्रस्तुत गर्नुभएको प्रवक्ता कृष्ण बहादुर महराले जानकारी दिनुभयो । बन्दसत्र शनिबार ११ बजे पुन बस्ने र मस्यौदामाथि समूहगत छलफलबाट आएका सुझाव र जिज्ञासामाथि स्थायी कमिटी सदस्य क. देवप्रसाद गुरुङले जवाफ दिनुहुने प्रवक्ता महराले जानकारी दिनुभयो । उहाले नेतृत्व चयनका काम सक्दै महाधिवेशन शनिबार नै सम्पन्न हुने बताउनुभयो ।
