नयाँ दिल्ली. 23, जुन 2020
भारत सरकारले बाबा रामदेवको पतंजली आयुर्वेदले बनाएको कोरोना भाईरसको औषधीको प्रचार प्रसारमा रोक लगाएको छ । भारत सरकारको आयुष मन्त्रालयले पतंजली आयुर्वेद लिमिटेडले कोरोनाको औषधी बनाएको भन्ने दावीमा प्रश्न खडा गर्दै औषधीको विधिवत जाँच नभएसम्म त्यसको प्रचार-प्रसार नगर्न र यससँग सम्बन्धित विज्ञापन पनि बन्द गर्न आदेश जारी गरेको छ । पतंजली बनाएको कोरोनाको औषधीबारे बोल्दै आयुष मन्त्रालयले कुन प्रकारका वैज्ञानिकहरुले कस्तो अध्ययनपछि औषधी तयार पारेका हुन त्यसको आफुहरुलाई जानकारी नभएको भनेको छ । मन्त्रालयले यससँग सम्बन्धित सम्पूर्ण जानकारीहरु पनि माग गरेको छ । सरकारले स्पष्ट रुपमा अर्को आदेशसम्मका लागि विज्ञापनमा रोक लगाएको छ ।
आयुष मन्त्रालयले पतंजलीसँग नमूनाको आकार, स्थान, अध्ययन गरिएको अस्पताल र आचार समितिको स्वीकृतिका बारेमा विस्तृत जानकारी उपलब्ध गराउन भनेको छ ।
यसअघि आज पतंजली योगपीठ हरिद्वारमा एक कार्यक्रम आयोजना गरि बाबा रामदेव र उनका सहयोगी आचार्य बालकृष्णले कोरोनिल नामक कोरोनाको औषधी सार्वजनिक गर्नुभएको थियो ।
बाबा रामदेवले यो औषधीको चिकित्सा नियन्त्रण अध्ययन र चिकित्सा नियन्त्रण परीक्षण गरि 2 पटक परीक्षण गरिएको बताउनुभएको थियो । उहाँले पहिलो चरणमा दिल्लीलगायत कयौं शहरहरुमा 280 जनामा चिकित्सा नियन्त्रण अध्ययन गरिएको र त्यसमा कसैको मृत्यु नभएको र शत प्रतिशत संक्रमितहरु निको भएको बताउनुभएको थियो । त्यसपछि दोस्रो चरणमा चिकित्सा नियन्त्रण परीक्षण गरिएको र त्यसमा 3 दिनभित्र 69 प्रतिशत रोगीहरु निको भएको र 7 दिनभित्र शतप्रतिशत संक्रमितहरु निको भएको बाबा रामदेवले बताउनुभएको थियो ।
उहाँले अहिले पनि कयौं मानिसहरुले औषधी बनाएको दावीमाथि प्रश्न गरेपनि आफुहरुसँग हरेक प्रश्नको जवाफ भएको बताउनुभएको थियो।
