नयाँ दिल्ली डेस्क, 16 मई 2020
भारतमा कोरोना भाइरस संक्रमितहरूको संख्या दिन प्रति दिन बढिरहेको छ। भारतमा संक्रमितको संख्या चीनभन्दा पनि बढी पुगेको छ। भारतमा अहिलेसम्म कोभिड-19 बाट संक्रमित हुनेको संख्या 85 हजार 940 पुगेको छ। त्यसैगरी कोरोना भाइरसको उद्गम बिन्दु देश चीनमा भने यो संख्या 82 हजार 941 छ।
भारतमा पछिल्लो 24 घण्टामा 3 हजार 970 नयाँ संक्रमित थपिएका छन्। त्यस्तै पछिल्लो 24 घण्टामा 103 जनाको मृत्यु भएको छ। यससँगै भारतमा कोरोना भाइरसबाट मृत्यु हुनेको संख्या 2 हजार 753 पुगेको छ। त्यसैगरी अहिलेसम्म 30 हजार 258 जना उपचारपछि सन्चो भएका छन्।
भारतको महाराष्ट्र राज्य कोरोनाबाट सबैभन्दा बढी प्रभावित बनेको छ। महाराष्ट्रमा अहिलेसम्म कोरोना भाइरसबाट संक्रमित हुनेको संख्या 29 हजार 100 पुगेको छ। 1 हजार 68 जनाको मृत्यु भइसकेको छ, भने त्यहाँ 6 हजार 564 जना उपचारपछि ठिक भएका छन्। तामिलनाडुमा अहिलेसम्म 10 हजार 108 जना संक्रमित भएका छन् भने 71 जनाको मृत्यु भएको छ। 2 हजार 599 जना उपचारपछि ठिक भएका छन्। त्यस्तै गुजरातमा अहिलेसम्म 9 हजार 931 संक्रमित पुगेका छन्। यो राज्यमा मृत्यु हुनेको संख्या पनि 606 पुगेको छ। त्यस्तै 4 हजार 35 जना ठिक भएका छन्।
त्यसैगरी राजधानी नयाँ दिल्लीमा कोरोना भाइरसबाट 8 हजार 895 जना संक्रमित भएका छन्। 123 जनाको मृत्यु भएको छ भने 3 हजार 518 जना उपचारपछि ठिक भएका छन्। भारतको मध्य प्रदेशमा संक्रमितको संख्या 4 हजार 595 पुगेको छ। यो राज्यमा 239 जनाको मृत्यु भइसकेको छ। पश्चिम बंगालमा 2 हजार 461 संक्रमित पुगेका छन् भने मृत्यु हुनेको संख्या 225 पुगेको छ।
उत्तर प्रदेशमा पनि संक्रमित संख्या 4 हजार 57 पुगेको छ। उत्तर प्रदेशमा अहिलेसम्म कोरोना भाइरसबाट 95 जनाको मृत्यु भएको छ। बिहारमा 1 हजार 18 संक्रमित पुग्दा 7 जनाको मृत्यु भइसकेको छ।
भारतको नागाल्याण्डमा भने अहिलेसम्म एउटा पनि मामिला फेला परेको छैन्।
