नयाँ दिल्ली, 23 मई 2020
भारतमा फसेका नेपालीहरुलाई नेपाल भित्र्याउनका लागि कुनै आधिकारिक निर्णय नभए पनि अहिले नेपाल जाने यात्रुको संख्या ह्वात्तै बढेको छ । नेपालका कयौं सीमा नाकामा आफ्ना नागरिकहरुको प्रवेशमा कडाई गरिए पनि अधिकांश नाकामा आवश्यक सोधपुछ र चेकजाँचपछि सहजै पस्न दिइएको छ । सुदुरपश्चिम प्रदेशबाट सीमा लाग्ने बनबसा नाकामा कयौं दिन पहिला पुगेका नेपालीहरुलाई प्रवेश गर्न नदिइएका बेला प्रदेशकै गौरीफण्टा नाकाबाट भने स्थानिय गाँउ, वडा र नगरको समन्वयमा पस्न दिएको छ । त्यसैगरि अन्य प्रदेशसँग सीमा जोडिएका रुपैडिहा, कृष्णनगर, सुनौली, बीरगंज लगायतका नाकाबाट पनि नेपालीहरु प्रवेश गरिरहेको खबर छ । यद्धपी सीमासम्म पुगेका नेपालीहरुले दुःख पाएको खबर पनि हामीलाई प्राप्त भएको छ । भारतमा लकडाउन केही खुकुलो भएपछि नेपाल जाने नेपालीहरुको संख्या बढेको हो । अहिले भारतका विभिन्न राज्यबाट नेपालका विभिन्न सीमासम्म दैनिक रुपमा बसहरु चलिरहेका छन । कयौं बस व्यवसायीले सीमा नखोलेको भन्दै बस चलाएका छैनन भने कयौं व्यवसायीले बस चलेको भन्दै आफै नेपाली यात्रुहरु बटुलिरहेका छन । भारतबाट एकै पटक सीमा खोल्दा कोरोनाको संक्रमण बढ्ने आशंकामा सीमा नखोल्ने निर्णय गरेको नेपाल सरकारले अहिले भने प्रदेश सरकारले भारत गएका प्रदेशवासीलाई भित्र्याउँदा कुनै प्रकारको प्रतिक्रिया दिएको छैन ।
