काठमाण्डौँ, 15 अप्रेल
कोरोना भाइरसको नियन्त्रणका लागि लकडाउन सुरु भएको 23 औँ दिन पनि काठमडौँ उपत्यका सुनसान छ। सरकारले लकडाउनको पूर्ण रुपमा पालना गराउन सुरक्षा संयन्त्रहरुलाई परिचालन गरेको छ। खासगरी काठमाडौँ उपत्यकामा मंगलबार दुई जनामा संक्रमण फेलापरे पछि झनै त्रास फैलिएको छ। जसका कारण पनि मानिसहरु बाहिर निस्किएका छैनन्।
यसअघि फाट्टफुट्ट रुपमा सडक पेटीमा देखिने मानिसहरु बुधबार देखिएका छैनन्। कोरोना भाइरसको संक्रमण फैलिन सक्ने भन्दै बुधबार सम्म कायम गरिएको लकडाउनलाई मंगलबार नै सरकारले 12 दिन समय थप गरी वैशाख 15 गतेसम्म लम्ब्याएको छ। यस्तै प्रशासनले पास वितरणमा समेत कडाई गरेको छ। सडकमा अत्यावस्यक सामग्रीको ढुवानी गर्ने र अत्यावस्यक काम पर्नेहरुका साधनहरु फाट्टफुट्ट चलेको देखिन्छ। प्रहरीले चोकचोकमा बसेर ती साधनहरुको नियमित चेकजाँच गरिरहेको छ।
