नयाँ दिल्ली, 3 अप्रेल
कोरोना भाइरस महामारीका कारण भारत लकडाउन गरिएपछि अलपत्र परेका नेपालीहरुलाई खानपिनको समस्या ठूलो चुनौति बनेको छ । विभिन्न संघ-संस्थाहरुले भोकै बस्न बाध्य नेपालीहरुलाई खाद्यान्न सहयोग गरिरहेका बेला दिल्लीको लक्ष्मी नगरमा रहेका सीए विद्यार्थीहरु पनि सहयोगका लागि अगाडी आएका छन ।
विद्यार्थी नेता सुधन महतको नेतृत्वमा केही नेपाली सीए र सीए विद्यार्थीहरुले निरन्तर सहयोग जुटाईरहेका छन । उनिहरुले लक्ष्मीनगर नजिक शास्त्री नगरमा भाडामा बस्ने 20 जना नेपालीहरुलाई 14 अप्रेल अर्थात लकडाउनको अवधि भरिलाई पुग्ने गरि खाद्यान्न वितरण गरेका छन।
प्रेमबहादुर शाही लगायतले सहयोगका लागि आग्रह गरेपछि आफुले सहयोगको अपील गरेको र त्यसपछि नेपाली सीए र सीए विद्यार्थीहरु अगाडी आएको विद्यार्थी नेता सुधन महतले बताउनु भयो ।
सीए रुद्र सिलवाल, सीए मधुरेन्द्र सिंह, सीए हेमन्त पाण्डे, सीए सबिता बस्नेतले 5 हजार मूल्य बराबर खाद्यान्न सहयोग गरेको र त्यो शास्त्री नगरका नेपालीहरुलाई बुझाइएको महतले बताउनुभयो ।
त्यसैगरि कैलाश श्रेष्ठ, सीए सुजन सुवल, सुरेन ढकाल, आरडी महतो, चन्दन कुशवाहा, निर्मल मरासिनी, रजत रौनियार, राजु भट्टराईलगायतले नगद सहयोग गर्नुभएको छ ।
अलपत्र परेका नेपालीहरुलाई सहयोग गर्ने उद्धेश्यले लक्ष्मीनगरका सीए सर्कलले लगातार सहयोग गरिरहेकोले आवश्यक परेकाहरुलाई वितरण गरिने महतले बताउनुभयो । उहाँले सहयोग गर्ने सबैप्रति आभार पनि व्यक्त गर्नुभएको छ ।
