बैतडी, 29 अप्रेल/ हिम शाह
एक महिनाभन्दा बढी समय भारतीय क्वारेन्टिन बसेका नेपालीहरुलाई बिहीबार स्वदेश फर्काइने भएको छ। भारतको पिथौरागढ जिल्लाका विभिन्न स्थानका क्वारेन्टिनमा बसेका नेपाली नागरिकहरुलाई बिहीबार स्वदेश ल्याउने तयारी भएको बैतडीका प्रमुख जिल्ला अधिकारी आनन्द पौडेलले जानकारी दिनुभयो। भारतको पिथौरागढ जिल्ला, नेपालको बैतडी र दार्चुला जिल्ला अधिकारीहरुबीच भएको सहमति अनुसार मजदुरहरुलाई स्वदेश ल्याउने तयारी भएको प्रमुख जिल्ला अधिकारी पौडेलले जानकारी दिनुभयो।
उहाँले भन्नुभयो ‘गृहमन्त्रालयबाट पनि मौखिक निर्देशन प्राप्त भएको छ। भारतीय प्रशासन र हामीबीच पनि अनौपचारिक सहमति भएर मजदुरहरुलाई स्वदेश फर्काउँछौं। बिहीबार एक दिनका लागि मात्रै सीमा मजदुहरुलाई स्वदेश फर्काउन खुला हुन्छ।’ उनीहरुलाई सम्बन्धित पालिकाको क्वारेन्टिनमा बस्ने गरेर स्वदेश फर्काउन लागेको प्रमुख जिल्ला अधिकारी पौडेलले जानकारी दिनुभयो। 14 दिन क्वारेन्टाइनमा बसेपछि उनीहरुको र्यापीड टेस्ट गरेर रिपोट नेगेटिभ आएमा घर पठाइने प्रमुख जिल्ला अधिकारी पौडेलले जानकारी दिनुभयो।
भारतीय सीमामा बैतडीका मात्रै 9 सय मजदुर रहेका छन्। एक महिनाभन्दा बढी भारतीय क्वारेन्टाइनमा बसेकाहरुलाई स्वदेश फर्काउनका लागि मजदुरहरुले बारम्बार आग्रह गरिरहेका थिए। सरकारले स्वदेश फर्काउने निर्णय गरेपछि मजदुरहरु खुसी भएका छन्।
आफूहरुलाई विदेशी भूमीमा धेरै समस्या भएको र स्वदेश फर्काउने निर्णयले खुसी तुल्याएको पुर्चौंडी नगरपालिका 3 का लोकेन्द्र पार्कीले बताउनुभयो। गाउँमा खेतीपातीको समयसमेत शुरु भईसकेकाले आफूहरुलाई घर फर्काउने निर्णयले साह्रै खुसी भएको डिलाशैनी गाउँपालिका 3 का रमेशराम ओडले बताउनुभयो।
