काठमाण्डौँ, 16 अप्रेल
नेपालभरी 19 हजार बढी परीक्षण भइसक्दा संक्रमितको संख्या यथावत रहेको स्वास्थ्य तथा जनसंख्या मन्त्रालयले जनाएको छ। बिहिबारसम्म नेपालभर कोरोना संक्रमितको संख्या 16 रहेको छ, जसमा एकजना निको भइसकेका छन्। स्वास्थ्य तथा जनसंख्या मन्त्रालयले परीक्षणको दायरालाई फराकिलो बनाइरहँदा नयाँ कुनै पनि नयाँ संक्रमित थपिएका छैनन्। हालसम्म नेपालभर 19 हजार 4 सय 32 जनाको पीसीआर तथा आरडीटी विधिबाट परीक्षण भइसकेको छ। हालसम्म पीसीआरबाट 7 हजार 2 सय 40 वटा नमुना परीक्षण भएको छ भने आरडीटीबाट 12 हजार 1 सय 92 जनाको परीक्षण भएको छ।
अहिले देशका 8 जिल्लाबाहेक अन्य सबै जिल्लामा आरडीटी परीक्षण सुरु भइसकेको छ। स्वास्थ्य मन्त्रालयका प्रवक्ता डा. विकास देवकोटाले आरडीटीमा केही जिल्लामा पोजेटिभ आएको, ती सबैको रिपोर्ट नेगेटिभ आएको बताउनुभयो। अहिलेसम्म संक्रमितको संख्या 16 नै रहेको छ, र एकजना निको भइसक्नु भएको उहाँले बताउनुभयो। अहिले देशैभर विभिन्न ठाउँमा क्वारेन्टिनमा 4 हजार 9 हजार 1 जना रहेका छन् भने आइसोलेसनमा 1 सय 3 जना रहेका छन्। त्यस्तै, स्वास्थ्य मन्त्रालयले सञ्चालन गरेको वेबसाइट र एपमा 18 हजार 4 सय 24 जनाले आफ्नो विवरण भरेर कोभिड-19 को संक्रमण रहे/नरहेको स्वमूल्याङ्कन गरेका छन्। जसमध्ये हालसम्म रेड जोनमा 2 सय 47 जना परेका छन्।
संक्रमण भएर उपचाररत रहेकामध्ये 2 जना टेकूस्थित टेकू अस्पताल, 2 जना बागलुङस्थित धौलागिरी अञ्चल अस्पताल, 5 जना धनगढीस्थित सेती प्रादेशिक अस्पताल र 4 जना वीरगञ्जस्थित नारायणी अस्पतालमा रहेका छन्।
