काठमाण्डौँ, 1 मे
राष्ट्रिय प्रजातन्त्र पार्टीले 131 औँ अन्तर्राष्ट्रिय श्रमिक दिवसको अवसरमा विश्वभरीका श्रमिक (मजदूर) वर्गमा समुन्नति, समृद्धि र सुखी जीवनको कामना गरेको छ। राप्रपा केन्द्रीय सचिवालय प्रमुखद्वय ध्रुव बहादुर प्रधान र भास्कर भद्राद्वारा जारी गरिएको एक विज्ञप्तिमा सुन्दर संसारको निर्माण गर्ने र मानव सभ्यतालाई आजको अवस्थामा पुऱ्याउन उल्लेखनीय भूमिका निर्वाह गरेका श्रमिकको जीवन कष्टकर रहिआएको र हाल विश्वमा फैलिरहेको कोरोना भाइरस (कोभिड-19) को चपेटामा पर्न गई उनिहरूको जनजीवन थप कष्टकर बन्न पूगेको उल्लेख छ।
साथै विज्ञप्तिमा सङ्गठित क्षेत्रका तुलनामा असङ्गठित क्षेत्रमा कार्यरत श्रमिक मजदूरहरूको अवस्था अत्यन्तै दयनीय रहेको उल्लेख गरिएको छ।
लकडाउनबाट पहिलो र प्रत्यक्ष असर श्रमिक जनताको जीविकामा परेको अवगत गराउँदै राप्रपाले विज्ञप्तिमार्फत् श्रमिक वर्गलाई गाँस, वास र कपासको प्रत्याभूति गर्न सरकारको गम्भीर ध्यानाकर्षण गराएको छ।
