नयाँ दिल्ली, 11 मे 2020
भारतमा करिब 2 महिनापछि रेल सेवा पुनः सञ्चालन हुने भएको छ। कोरोना भाइरस (कोभिड 19) नियन्त्रण तथा रोकथामका लागि भन्दै भारत सरकारले 2 महिनाअघि रेलवे सेवा बन्द गरेको थियो। उक्त रेल सेवामध्ये राजधानी नयाँ दिल्लीमा भोली अर्थात् 12 मे मंगलबारदेखि सेवा पुनः सुरु हुन लागेको हो।
रेलवे मन्त्री पियुष गोयलले मंगलबारदेखि रेलवे सेवा पुनः सञ्चालनमा आउने जानकारी दिनुभएको छ। आइतबार उहाँले ट्वीट गर्दै सो जानकारी दिनुभएको हो। रेल सेवाका लागि आज साँझ 4 बजेदेखि नै अनलाइन बुकिङ हुने छ। मंगलबारदेखि सुरु हुन लागेको यस सेवाका लागि रेलवे सेवाका काउन्टरहरूबाट भने टिकट किन्न पाइने छैन। काउन्टरमा भीडभाड हुने भएकोले अनलाइनबाटै टिकट किन्न पाइने अधिकारीहरुले जानकारी गराएका छन्।
भारत सरकारका अनुसार मंगलबार नयाँ दिल्लीबाट 15 वटा रेल देशभरका मुख्य रेलवे स्टेशनका लागि छुट्ने छन्। नयाँ दिल्लीबाट अगरताला, होरह, पटना, विलासपुर, राँची, भुवनेश्वर, सिकन्दरावाद, बैंगलुरू, चेन्नाइ, थिरूवानानुथपुरम, मदगाउँ, मुम्बई सेन्ट्रल, अहमदावाद र जम्मु तावीका लागि रेलसेवा उपलब्ध हुने बताइएको छ।
यात्रा गर्नुअघि ती सबै रेलवे स्नटेशमा यात्रुहरूको स्वास्थ्य जाँच पनि गरिने जनाईएको छ। स्वास्थ्य परीक्षणमा कोभिड 19 को कुनै पनि लक्षण देखिएमा उनिहरुलाई रेलमा प्रवेश गर्न दिइने छैन्।
त्यसैगरी यात्रुहरूले अनिवार्य रुपमा मास्कको प्रयोग गर्नु पर्नेछ। भारत सरकारले यसअघि अलपत्र परेका मजदूरको उद्धार निम्ती पनि रेल सेवा सुरु गरेको थियो। यही मे 1 देखि श्रमिक रेलहरु सञ्चालनमा ल्याएको बताइएको थियो। ती रेलहरुले भारतका विभिन्न स्थानमा अलपत्र परेका ठूलो संख्याका मजदूर तथा विद्यार्थीको उद्धार गरेको सरकारले जनाएको छ।
